Nazioartean entzun gaituzte

Ia 25.000 bisita izan ditu Zubietako flashmobak. Horietatik asko nazioarteko bisitak izan dira, hainbat erakundek oihartzuna eman diolako, esate baterako Europako Zero Zabor, Greenpeace eta berriki aire garbiaren alde borrokatzen duen earthjustice erakundeak. Irakurtzekoa da egin duten iruzkintxoa, polita, Sam Edmondson-ek sinatzen du: Dancing for Clean Air, Basque Style

Nazioartean entzun gaituzte. Hemen noiz?

Erreportaje bikaina

Argia.com gunean BERANDUEGI saio ganberroa egiten dute eta aste honetako erreportajea Zubietako flashmobari eskaini diote. Umorea eta mezu zuzena uztartuz, igandean bizitako komunioa ederki islatzen du.

Katxiporreta telebistan ere atera gara, hau ere kariño guztiz egina dela nabari da.

Eta oraintxe esan digute ETB2ko goizeko eztabaida saioan errausketa izan dutela hizpide eta flashmobaren irudiak bota dituztela. Puri-purian jartzea lortu dugu!!

Emozionantea

Atzo Zubietan gehien entzuten zen esaldia hau da: “emozionantea izan da”. Aurrean zeudenak olatua atzeratzen ikustean, atzean zeudenak aurreko jende masa dantzan ikustean, Montetxio koruak bere bista pribilejiatutik, denak gauza bera, “emozionantea izan da”. Bihotzak topera.  Mikel Mondrak ere “pasatuta natxiok” esan zigunean bezala. ZZk jendearekin lortu zuen konexioa bezala, Laxak Joy japoniarrarekin eduki zuen elkarrizketa bezala. Emozionantea izan zen. Lagun artea eta umore ona. Konexioa. Kriston konexioa.

HORREGATIK eskerrik asko guztioi. Antolaketa lanetan ibili zaretenei (Garazi, Muger, Irati, Ainhoa, Saioa, Pelo, Ainara, Labi, Josune…), herriz herri dantza erakusten ibili zaretenei (Arantxa, Alaitz, Goizane, Nerea, Paxo, Mikel, Urki, Ana, Eztizen, Izaskun…), Euskal Herriko hiru ahots eta pertsona ederrenei (Eñaut, Harkaitz eta Ioritz), inoiz huts egiten ez duen Montetxio koruari, LAXAri, Eutsiorreiko paella-gizonei, free styleko Jeniri, bi autobusak antolatu dituzuenoi (Inhar, Josune, Gema…), Arraio irratiari, Mollarriri, Iratzarriri, Alprojari, Xatori (karretillagatik), eskubaloikoei, autobusak bete zenituztenei, transporte publikoa hartu zenutenoi, irripar bat oparitu zenigutenei, belarrira kunplitu ezin genituen aholkuak ematen zenizkiguzuenoi, zoriontzera etorri zinetenoi. Guzti guztioi, eta pasa zaizkigunei, ESKERRIK ASKO.

Aste honetan egingo dugu balorazioa eta bideo ofiziala ere lehen bait lehen kalean egoteko lanean ari gara. Ostirala baino lehen ez espero, hala ere.

Informazio gehiago, irudiak, prentsako agerpenak (ETBkoak ezik, haientzat ez da notizia izan) eta bideo ez-ofizialak: http://www.gipuzkoazz.com web gunean aurkituko dituzue.

Ah, eta adi, ze dagoeneko MORATORIAren aldeko hurrengo asaltoa pentsatzen hasi gara-eta 🙂

Martxoaren 20an, igandea, 10:30tatik 14:00tara, FLASH MOB, animatu eta parte hartu!!

FLISH MOB ZUMAIAN

Moratoria eskatzeko ez da dantzaria izan behar

GARA egunkarian dator artikulua:

Kez beteko dizkigute Gipuzkoako birikak, utziz gero. Foru Aldundiak Zubieta aukeratu du errauste planta pozoitsua eraikitzeko kokaleku eta hain zuzen bertan, Zubietan, Gipuzkoako biriketan, 2.000 lagun, 2.000 gipuzkoar dantzan jarri nahi ditugu. Gaiztakeria erraldoiari erantzun erraldoiagoa emango diogu, eta errauste plantari sei urteko moratoria eman diezaioten eskatuko dugu.

Martxoaren 20a aukeratu dugu gipuzkoar guztiok ahots bakarrez moratoria eskatzeko. Martxoaren 20a da, beraz, ikuskizunaren eguna. Datorren igandea. Egun sinbolikoa izango da gainera, propio aukeratutakoa, duela bi urte abiatu zelako Usurbilen atez ateko hondakinen gaikako bilketa. Zubietak arazoa erakusten du, eta martxoaren 20ak irtenbidea. Errauste planta eta atez atekoa aurrez aurre daude eta… 

Bihotza bakarrik behar da

Gipuzkoako Foru Aldundiak Donostian errauste-planta egitea erabaki duenetik Gipuzkoako gehiengo soziala moratoria eskatzeko batu gara. Denbora bakarrik eskatzen dugu. Denbora, herrietan zero zabor programak martxan jartzeko. Denbora, errauste-planta ez dela beharrezkoa frogatzeko. Denbora, gure osasunari kalterik egin gabe hondakinak kudeatzen hasteko. Denbora, soilik denbora apur bat.

Gipuzkoan hondakinek erre egiten gaituzte. Zabortegietatik gertu bizi direnak erreta daude, eta Zubietakoak, erretzear. Moratoriarik gabe bizpahiru urte barru gipuzkoar guztiok errautsa jaten amaituko dugu. Moratoria behar-beharrezkoa dugu.

Ez da erraza izango. Errauste-plantak lotuta dauka Foru Aldundia. Gizarteari ez dio entzun nahi. Hondakinak erretzea baino alternatiba iraunkorrago, ekonomikoago eta osasuntsuagoak daudela jakin badaki Foru Aldundiak, baina ez die aukera txikienik eman nahi. Itsutu egin da.

Foru Aldundiak begiak ireki behar ditu. Eta horretarako, proposamen bat daukagu: moratoria emateko bihotza bakarrik behar denez, martxoaren 20an Zubietako Flash Mobean gure bihotzak azalduko ditugu. Gure bihotza emango diogu Foru Aldundiari, moratoria emateko bihotza izan dezan. Horregatik, herritar guztiak gonbidatu nahi ditugu, martxoaren 20an Zubietara gurekin batera bihotza azaltzera joan daitezen.

Deialdi hau sinatu dute:
Gipuzkoa Zero Zabor, EHNE, LAB, Ezker Abertzalea, Ekologistak Martxan, Ezker Batua, Berdeak, Donostia Bizirik. (Oraindik atxikimenduak jasotzen ari gara.)

Oñati dantzan

Sekulako bideo polita egin dute Oñatiko lagunek, merezi du ikusteak.

Merkatu plazan ere dantzan

Musika Plaza atzo, beteta, flashmoba dantzatzen

Flashmobaren entsegua egin genuen atzo Barren plazan eta Musika plazan eta bietan sekulako giroa jarri genuen. Hemen daukazue bideo hau, kalitate kaxkarrekoa, baina atzo bizitako une eder horiek jasotzen dituena. Herri guztietan koreografia zenbat lagun ari diren ikasten ikusita, itxaropena hazten ari zaigu. Martxoaren 20an Zubietan mundu oso bat elkartuko gara, ‘hartu nahi dut arnas’ dantzatzera.

Larunbatean 19:00tan Barren Plazan entsegua

Iñauteri egunean kolorez beteko dugu Barren Plaza, FLASHMOB dantzaren entsegua egingo baitugu 19:00tatik 20:00tara.

Aste honetan hasi gara herrian kuadranteak betetzen (10 laguneko taldeak) eta horiek guztiek dantza ikasteko aukera daukate larunbat honetan. Azken egunerarte dantza ikasi gabe egon nahi ez dutenek, beraz, larunbat honetan daukate aukera ederra, mozorrotuta edo gabe, umore onean, flashmob saioa egiteko.

Entseguan bertan ere banatuko ditugu kuadranteak. Hortaz lagun kuadrila, edo plaierotako taldea edo…, martxoaren 20an Zubietan dantza egiteko zuen kuadrante propioa izateko aukera daukazue. Ez duzue Fred Astaire izan behar, martxoaren 20an zuen kuadrantea beteta egon dadila konpromisoa hartzeko bakarrik eskatuko zaizue.

Gipuzkoako Mariñelak

Martxoaren 20an guztiok Zubietara. / El 20 de Marzo tod@s a Zubieta.

Zirrara

Atzo gauean telebista aurrean zirrara sentitu genuen jende askok, sagardotegia leporaino beteta flash moba egiten ikusita. Hitzetik Hortzera saioan bota zituzten irudiak eta bertsolarien bertso bikainak. Hortxe geratuko da hori, zero zabor norabidean gizarte eragileak egiten ari garen lanaren seinale. Martxoaren 2oko flash mob erraldoia ezagutarazteko balio izan zuen atzo telebistan agertzeak, baina batez ere flash moba zein dibertigarria den erakusteko balio du. Sagardotegian bizi izan genuen giroa ederki jasotzen zuelako, martxoaren 20an izango dugun girotzarraren aurrerapen moduan.

Hemen daukazue atzoko programa osoa, online. Bertso moba 12. minutuan dago eta aurrerago, 42. minutuan egun horretan grabatutako bertso gehiago daude.

FLASH MOBaren iragarkia grabatzen

Gaur kalera irten gara Zubietan martxoaren 20an egingo dugun FLASH MOB erraldoiaren iragarkiak grabatzera. Lau bideo egitea da asmoa, ondoren internet bidez zabaltzeko. Bideoetan flashmobaren abestia eta koreografia agertuko dira, baina baita narrazio txikitxo bat ere sarrera eta bukaera moduan.

Goiz guztia pasa dugu grabatzen. Zarauzko merkatu plazan, Getariako Marinelak itsasontzian eta Donostiako Bretxa saltokian izan gara. Bikaina izan da esperientzia. Eguraldi ezin hobea egin digu eta gure arteko giroa ere zoragarria izan da. Kristona izan da, merkatu plazan lurrean etzatea…. itsasontzi batean saltoka ibiltzea… ez da ohikoena 😛  eta dantzan hasten ginenean jendeak flipatu egiten zuen.

Etxera itzultzean horrelako gehiago egiteko eskatu digute dantzariek. Gu prest 🙂 Gipuzkoako herri guztietan bat egitea lortuko bagenu sekulakoa litzateke. Gipuzkoa dantzan jartzeko aukera polita da. Ea bideoak laster editatzen ditugun zuekin guztiekin zabaltzeko. (Ah, eta eskerrik asko dantzari, kamara, laguntzaile…. GUZTIEI!!)

Urola Kostako HITZAn azkar eta txukun ibili dira eta hemen ikus ditzakezue bideoa eta argazki polit batzuk. Eskerrik asko kazetariei ere 🙂

Gure argazki bilduma Facebooken jarri dugu.

Dantzaren hizkuntza

Martxoaren 2oan Zubietan dantzatuko dugun FLASH MOBeko abestiaren koreografia Mikel Erguin, Mondra, zarauztarrak egin du. Bideoan bere lanaren inguruko azalpenak ematen ditu. Bere hitzetan ederki asko nabaritzen da koreografiak duen sentimendu eta intentsitate bera.

Soñamos con bailar. Bailamos para soñar.

Hasi dira ensaioak. Hazia jarrita dago. Kanta ederra eta koreografia inpresionantea. Irudikatzen dituzue Zubietako plazan 2000 lagun hauxe dantzatzen? Efektoa ikusgarria izango da.

FLASH MOB erraldoia Zubietan egingo dugu, martxoaren 20an, igandea, eguerdi partean. Asmoa da Zubietako plazan elkartasun uholdea sortzea, enerjia transformatzaileaz inundatzea, eta Zubietako bizilagunei besarkada bat ematea gipuzkoar guztion partetik.

Martxoaren 20a egun berezia izango da, dudik pe, karga sinboliko handia izango duena. Deialdia zabaltzen laguntzen bagaituzue, eta milaka herritarrek erraustegiaren proiektuan moratoria eskatzen badugu, moratoria lor genezake. Zergatik ez. Dantza egiten duen herriak edozer lor dezakeelako. Zarautzen lortu zen txoznak munoara ekartzea. Eta gogoratzen ze ondo pasa genuen?

Euskal Herriko dantzari eta dantzazale guztiak proiektu honetan inplikatu behar ditugu, martxoaren 20koa benetan handia izan dadin.

Zuen herrietara dantza erakustera joatea nahi baduzue, mesedez jarri gurekin harremanetan: gipuzkoazz@gmail.com. Gu gustora joango gara.

Ikusi duzunez, gainera, koreografia potentea da, baina ikasteko oso sinplea. Internet bidez dantza ikasi nahi dutenentzat ere bizpahiru aste barru tutorialak igoko ditugu. Eta aurrerago ensaio orokorrak antolatuko ditugu Usurbilko kiroldegian, martxoaren 20rako dantza jakinda izan nahi duten gipuzkoar guztiek dantza ikasteko aukera izan dezaten. Martxoaren 20an bertan ere izango da dantza ikasteko aukera, egingo diren tailerretan. Aitzakiarik ez dago beraz, martxoaren 20an zubietarrei maitasuna eta babesa erakusteko.

Adi beraz. FLASH MOB, martxoak 20 Zubietan, osasuna atez ate, MORATORIA, errausketarik ez.

Mesedez, lagundu gaitzazu zure lagunen artean mezu hau zabaltzen.