“Hernanin ondo ari gara”

Hernanin Zero Zabor taldeak deialdia egin die herritarrei datorren igandean, urtarrilak 9, eguerdiko 12:30etan Gudarien plazan egingo den agerpen publikora etortzeko, hondakinen gaian hilabeteotan herriak egin dituen aurrerapen nabarmenak aldarrikatzeko. Bilera laburra izango da: bildutakoekin argazkia osatzeaz gain, bertan agiri bat irakurriko da euskaraz “Eskuz esku, Atez ate: Ondo ari gara” dioena eta gaztelaniaz “Mano con mano, Puerta a puerta: Lo estamos haciendo bien”.

HZZkoek diotenez, “hamar hilabeteotan sekulako pausoa eman dugu Hernanin gure hondakinak tratatzeko moduan, gure kondarren hiru laurdenak zabortegira bidaltzetik %80 baino gehiago ondo bereizita eta birziklatzeko moduan biltzera pasatu gara. Gainera, 700 familia baino gehiagok, konposta egiten du. Badakigu badaudela gauzak hobetu beharrekoak, baina egin den bidea izugarri inportantea da. Hernaniarrok dagoenekoz ez daukagu errauste planta beharrik, ez gure buruak eta ez munduko beste inor ez dugu kutsatuko, daukagun Atez Ateko sistema askoz hobea da, merkeagoa eta oso erreza”.

Bilkura honekin mezu bat ere bidali nahi zaie Hernaniren izen ona zikindu nahian dabiltzan komunikabide handiei, zaborretan nagozioa duten enpresa handiei eta horien interesak defenditzen dituzten politikoei, eskatuz errespeto handiagoz tratatzeko Hernani. Beste aldetik, oraindik bilketa ondo egin nahi ezik dabiltzan herritar bakanei eskatuko diete uzteko alde batera beren egoskorkeria.

“Gure mezua baikorra eta alaia da”, diote HZZkoek. “Atez Atekoarekin ez dago galtzailerik, denok irabazi dugu, dirutan, ingurumenaren kalitatean eta denon osasunean. Horrela segitu behar dugu, oker dauden gauzak zuzenduz eta gauzak gero eta hobeto eginez. Hernanin ondo ari gara”.

Hernanin Zero Zabor.

Herritarron erantzukizuna eta supiztaileen gezurrak

Kontxi Aldanondo, Hernanin Zero Zabor taldeko kideak, Berrian argitaratutako gutuna.

Gipuzkoan milaka familiak lagatzen dituzte azken denboretan etxeko hondakin organikoak kaleetan, horretarako ipinitako edukiontzietan; bosgarren edukiontzia zabaldu ahala, gero eta familia gehiagok egingo dute. Horretarako beren etxeetan hondakinak bereizten dituztenek (papera eta kartoia, organikoa, plastiko eta ontzi arinak, beirakiak… eta azkenik errefusa) erakusten dute ohitura aldaketa txiki batekin asko hurbiltzen garela «Zero Zabor» helburura. Gauza bera esan dezakegu etxeetan konposta egiten duten milaka familiez.

Bosgarren edukiontziarekin konprometitu diren familiok eta autokonposta egiten dutenak, denak borondatez ari dira eta gure txaloa merezi dute. Azken finean, Usurbil, Hernani eta Oiartzungo herritarrok egiten duguna berdin egiten dute haiek ere: hondakinen bilketa bereizia. Hondakinak gutxitu, berrerabili eta birziklatzeko borrokan, guztiok elkarrekin ari gara lubaki berean.

Baina, gainera, bosgarren edukiontziarekin ari diren familiek meritu handiagoa daukate; zeren eta beren inguruan familien lautatik hiruk paso egiten baitiote bilketa selektiboari, Gipuzkoako agintariek erabaki dutelako hori borondatezkoa izatea. Hor dago koska, hain zuzen.